ທ່ານເລຂາພັກ – ເຈົ້າແຂວງໆ ສາລະວັນ ເຄື່ອນໄຫວຢ້ຽມອ້າຍນ້ອງທະຫານກອງບັນຊາການທະຫານເມືອງສາລະວັນ

ໃນຕອນເຊົ້າ ເວລາ 8:00 ໂມງ ຂອງວັນ 19 ມັງກອນ 2018 ທີ່​ຜ່ານ​ມາ​ນີ້ ຢູ່ທີ່ຫ້ອງປະຊຸມຂອງກອງບັນຊາການທະຫານເມືອງ ສາລະວັນ ທ່ານ ສີສຸວັນ ວົງຈອມສີ ກໍາມະການສູນກາງພັກ ເລຂາພັກ – ເຈົ້າແຂວງໆສາລະວັນ     ໄດ້ລົງເຄື່ອນໄຫວຢ້ຽມຢາມ ອ້າຍ​ນ້ອງທະຫານ​ກອງ​ບັນຊາ​ການ​ທະຫານ​ເມືອງ​ສາລະ​ວັນ ເນື່ອງໃນໂອກາດສະເຫຼີມສະຫຼອງວັນສ້າງຕັ້ງກອງທັບປະຊາຊົນ ລາວ ຄົບຮອບ 69 ປີ ໂດຍການຕ້ອນຮັບຂອງ ທ່ານ ພັທ ຄໍາເບັນ ແກ້ວສາຍທອງ ເລຂາຄະນະພັກຮາກຖານ, ຫົວໜ້າກອງບັນຊາການທະຫານເມືອງ ພ້ອມດ້ວຍນາຍ ແລະ ພົນທະຫານທົ່ວກອງບັນຊາການທະຫານເມືອງສາລະວັນ.

ການ​ເຄື່ອນ​ໄຫວ​ຢ້ຽມຢາມ​ຄັ້ງນີ້, ທ່ານ ທ່ານ ພັທ ຄໍາເບັນ ແກ້ວສາຍທອງ ເລຂາຄະນະພັກຮາກຖານຫົວໜ້າກອງບັນຊາການທະຫານເມືອງ ກໍ່​ໄດ້​ລາຍ​ງານສະພາບການເຄື່ອນໄຫວໂດຍຫຍໍ້​ກ່ຽວ​ກັບການ ຈັດຕັ້ງປະຕິບັດ​ວຽກ​ງານປ້ອງກັນຊາດ – ປ້ອງກັນຄວາມສະຫງົບ ​ໃນ​ການ​ປະຕິບັດ​ມະຕິ​ກອງ​ປະຊຸມ​ໃຫ່ຍຄັ້ງທີ X ຂອງ​ສູນ​ກາງ​ພັກ, ຄັ້ງທີ VIII ຂອງ​ອົງຄະ​ນະ​ພັກ​ແຂວງ ກໍ​ຄື​ການຜັນຂະຫຍາຍແນວທາງນະໂຍບາຍຂອງພັກໃຫ້ອ້າຍນ້ອງນາຍ ແລະ ພົນທະຫານ, ການ​ແກ້ໄຂຊີວິດການເປັນຢູ່ ​ແລະ ການປະຕິບັດຄຳຂວັນ “ ກຸ້ມຕົນເອງ, ເພິ່ງຕົນເອງ ແລະ ສ້າງຄວາມເຂັ້ມແຂງດ້ວຍຕົນເອງ”ໃນໂອກາດດັ່ງກ່າວ ທ່ານ ສີສຸວັນ ວົງຈອມສີ ​ກຳມະການ​ສູ​ນກາງ​ພັກ, ​ເລຂາ​ພັກ – ​ເຈົ້າ​ແຂວງໆ ສາລະ​ວັນ ໄດ້ມອບເງິນຈໍານວນ 100.000.000 ກີບ (ໜຶ່ງຮ້ອຍລ້ານກີບ) ​ໃຫ້​ແກ່ກອງບັນຊາການທະຫານເມືອງສາລະ​ວັນ ເພື່ອສົມທົບທືນກໍ່ສ້າງກໍາແພງອ້ອມຮອບກອງ​ບັນຊາ​ການ.

ຈາກນັ້ນ ທ່ານກໍໄດ້ໃຫ້ກຽດໂອ້ລົມຕໍ່ອ້າຍ​ນ້ອງທະຫານກອງບັນຊາການທະຫານເມືອງສາລະວັນ​​ເຊິ່ງທ່ານໄດ້ນຳເອົາຄວາມຢ້ຽມຢາມຖາມຂ່າວອັນອົບອຸ່ນ, ຄວາມຮັກແພງອັນສະໜິດສະໜົມຈາກຄະນະ​ພັກ, ຄະນະ​ປົກຄອງ​ແຂວງ ມາຍັງບັນດາອ້າຍນ້ອງທະຫານ ແລະ ຜ່ານໄປຍັງບັນດາຄອບຄົວຜູ້ທີ່ໄດ້ສະຫຼະຊີວິດ, ຜູ້ບາດເຈັບ, ຜູ້ເຈັບປ່ວຍ ທີ່ກຳລັງພະຍາບານຕົນ ບັນດານາຍ ແລະ ພົນທະຫານ ທີ່ອອກໄປປະຕິບັດໜ້າທີ່ຢູ່ເຂດທຸລະກັນດານ ແລະ ບັນດາສະຫາຍທີ່ອອກພັກຜ່ອນບຳນານ. ພ້ອມທັງສະແດງຄວາມຍ້ອງຍໍສັນລະເສີນມາຍັງບັນດາສະຫາຍພະນັກງານແລະນັກຮົບທົ່ວກອງ​ບັນຊາ​ການທີ່ໄດ້ພ້ອມກັນຕັ້ງໜ້າເຮັດສຳເລັດໜ້າທີ່ອັນມີກຽດສະຫງ່າຂອງຕົນ. ນອກຈາກນີ້, ຕໍ່ກັບຄວາມຫຍຸ້ງຍາກ ແລະ ສິ່ງທ້າທາຍຫຼາຍປະການ ທ່ານ​ ກໍາມະການສູນກາງພັກ, ເລຂາ​ພັກ – ​ເຈົ້າ​ແຂວງໆ ສາລະວັນ ຍັງໄດ້ຍົກໃຫ້ເຫັນສະພາບການພົ້ນເດັ່ນ ທີ່ເກີດຂຶ້ນໃນພາກພື້ນ, ສາກົນ ​ແລະ ໃນ ສປປ ລາວ ບັນດາອິດທິກຳລັງປໍລະປັກ ແລະ ພວກກຸ່ມຄົນບໍ່ດີ ຍາມໃດກໍ່ຄິດຢາກທຳລາຍມ້າງເພລະບອບໃໝ່ ຢ່າງຮອບດ້ານ ດ້ວຍຫຼາຍຮູບ – ຫຼາຍສີ.

ສະນັ້ນ, ​ໃນ​ຕໍ່ໜ້າ ທ່ານ​ໄດ້ເນັ້ນໜັກໃຫ້ເອົາໃຈໃສ່ສຶກສາອົມຮົມການເມືອງ-ແນວຄິດຕໍ່ນາຍ ແລະພົນທະທະຫານເຊິ່ງກ່ອນອື່ນໝົດຕ້ອງເຊີດຊູສະຕິລະວັງຕົວຕໍ່ກົນອຸບາຍຂອງສັດຕູ ມີສະຕິໃນການປົກປັກຮັກສາ ແນວທາງນະໂຍບາຍຂອງພັກ-ລັດ, ປົກປັກຮັກສາລະບອບໃໝ່, ລະບອບປະຊາທິປະໄຕ ປະຊາຊົນ ໄວ້ໃຫ້ໝັ້ນຄົງ, ສົມທົບຢ່າງໜັກແໜ້ນກ່ຽວກັບວຽກງານການປ້ອງກັນຊາດ – ປ້ອງກັນຄວາມສະຫງົບ, ຮັບປະກັນຄວາມເປັນຄວາມລະບຽບຮຽບຮ້ອຍຂອງສັງຄົມ, ມີຄວາມຈົ່ງຮັກພັກດີຕໍ່ພັກ ແລະ ປະເທດຊາດ, ປັບປຸງພາຍໃນໃຫ້ໜັກ ແໜ້ນ, ເຂັ້ມແຂງ ແລະ ເດັດຂາດ, ສືບຕໍ່ປົກປັກຮັກສາ ແລະ ເສີມຂະຫຍາຍມູນເຊື້ອອັນດີງາມຂອງຕົນ, ຕັ້ງໜ້າປະກອບສ່ວນເຂົ້າໃນການຊ່ວຍເຫຼືອກຳລັງທ້ອງຖິ່ນຢູ່ຮາກຖານ,ສຸມທຸກເງື່ອນໄຂຄວາມສາມາດເພື່ອກ້າວໄປເຖິງການກຸ້ມຕົນເອງຢ່າງຮອບດ້ານ ດ້ວຍການສ້າງວຽກງານພະລາທິການກັບທີ່ ເປັນວຽກງານຕົ້ນຕໍ ແລະ ສືບຕໍ່ເປີດກວ້າງການພົວພັນສາມັກຄີສາກົນ ຕາມແນວທາງການຕ່າງປະເທດຂອງພັກ

ອອກ​ຈາກ REPLY ເປັນ

Please enter your comment!
Please enter your name here